السلام عليكم ورحمة الله.. معلهش الخميس اللي فات ملحقتش أكتب الركن الهادي.. والأسبوع ده. قبل ما تحصل كارثة الدويقة. كانت معظم الرسائل عن امتحانات كادر المعلمين واللي حصل فيها.. وأنا حنشر هنا بعضها من غير تعليق. لأنها موش محتاجة.
* علاء عبدالعزيز مدرس بديروط أم نخلة بالمنيا مثلا. كتب يقول:
كان نفسي تشوفنا واحنا رايحين كلية الآداب بجامعة المنيا عشان اختبار كادر المعلمين وكل واحد فينا فـ إيده سندوتشاته وقزازة ميته وقلمه الرصاص وأستيكته ورقم جلوسه ويا سلام كمان لو شفتنا واحنا محتارين ودايرين علي أماكن جلوسنا زي الأطفال!! أنا بصراحة جاوبت ميّه ميّه لكن برضو عندي قلق من امتحانات لم يسبقها تدريبات وعشان كده بصراحة أنا فكرت لو جبت ملحق مش هخبي عليك أنا يمكن أهرب وآجي أستخبي عندك.
* ومني محمد جمال عبداللطيف بالحرافشة - سوهاج:
تقوم الدنيا ولا تقعد في مصر إذا جاء المعلم بسؤال من خارج المنهج للطالب ويعاد توزيع درجات السؤال ويُعاقب واضعه بالحرمان خمس سنوات من أعمال الامتحانات فيجب أن تكون الأسئلة بنسبة 100% من المقرر.
- أما المعلم فتم اختباره في 40% من مادة تخصصه و60% من خارج المنهج وبدون تدريب أو تسليم مقررات.
- الطالب يمتحن في شهر كامل تقريبا أما المعلم فعليه الإجابة عن مائة سؤال في ثلاث ساعات فقط منها 20 دقيقة لكتابة البيانات.
- الطالب يمتحن قبل المعلم.
- الطالب يستخدم القلم الحبر إلا في الصف الأول الابتدائي والمعلم لا يستخدم إلا القلم الرصاص والممحاة.
- التصحيح اليدوي لامتحانات الطلاب والتصحيح الآلي لاختبارات المعلمين.
- نتيجة الطالب بعد أسبوعين والمعلم بعد شهرين.
- التلميذ له دور ثان بعد شهر أما المعلم فبعد عام كامل.
* ومن عربي عبدالمطيع علام - المنصورة اللي كتب أبيات بعنوان "أغنية الكادر" يقول فيها:
اللي يذاكر يطلع شاطر
واللي يعوم يوصل للكادر!
كل حقيقة كانت فكرة
وأقعد فكر.. لما هتكبر!
تبقي معلم ولا خبير
معلم أول والا كبير!
بس كفاية شرح وزعط
حس بهدفك أكتب صح!
واللي يذاكر يطلع شاطر
واللي يعوم يوصل للكادر!
من وحي أغنية للأطفال بالإذاعة المصرية سمعها كل معلم؟!
* قرأت في إحدي الصحف المعارضة. أن سبب عدم سفر أول المكفوفين علي مستوي الجمهورية مع زملائه أوائل الثانوية العامة في الرحلة التي تنظمها "الجمهورية" لهم إلي أوروبا. هو أنه كفيف وأن القائمين علي الرحلة قالوا له: حتسافر تشوف إيه.. وهذا شيء مؤلم إذا كان حدث.. أتمني معرفة الحقيقة.
أمير السيد سليم - كوم حمادة - بحيرة
** المحرر: ده أحد نماذج كذب بعض صحف المعارضة وبعض القنوات الفضائية أيضا اللي اتعودنا منها كل سنة أنها تنسج حكايات وروايات حول عدم سفر أول المكفوفين وازاي "الجمهورية" متعسفة معاه.. من غير مانشوف أي مبادرة من الصحف أو الفضائيات دي بالتطوع بتنظيم رحلة للطالب علي حسابها مثلا أو تقديم أي تكريم أو تقدير له.. وإنما بس هجوم علي رحلة "الجمهورية" لأن كل الصحف والفضائيات دي تعجز عن تنظيم رحلة زيها.
* ولاء عبدالحافظ محمد - من أسيوط. كتبت تقول:
أعود مرة أخري للكتابة بعد أن انتهيت من دراستي وتخرجت في كلية التربية قسم اللغة الإنجليزية.. وخايفة يطول انتظاري في طابور العاطلين. خصوصا بعد ما لقيت خريجي زراعة وعلوم وكليات أخري غير التربية بيشتغلوا في التدريس من سنين.. أرجو يلحقوا يوظفوني قبل ما انسي الكلمتين اللي درستهم.
** المحرر: اختاري حاجة من اتنين.. العريس.. أوالتدريس.
* نورهان محمد نورالدين - من القاهرة. كتبت تقول:
مع حلول الشهر الكريم أتعجب كثيرا لما أسمع عنه من وجود "الخيمة الرمضانية" واللي مفردها في رأيي الخيبة الرمضانية اللي بيكون فيها رقص وغنا واختلاطات بين الشباب والبنات وده بزعم إحياء ليالي رمضان هل هذا ما أمرنا به الله. هل هذا هو قيام الليل بالنسبة لهؤلاء القوم؟!.
** المحرر: موش كل خيمة رمضانية بيحصل فيها ده. عندنا مثلا خيمة مجلة "حريتي" عاملين فيها مكان للصلاة والناس بتروح تفطر وتصلي المغرب والعشا فيها وتقعد مع بعضها.. وتقضي وقت جميل.. تعالي وشوفي بنفسك.
* حمدا لله علي السلامة.. واعمل حسابك تاخد أوائل المعلمين في امتحانات الكادر معاك السنة الجاية في رحلة أوائل الثانوية العامة لأوروبا.. وحتلاقيهم كويسين.. وحيتكيفوا بسرعة مع الطلبة.. وبالمناسبة سمعنا إن في ألمانيا. الراجل اللي مراته تتجاوز الأربعين سنة من حقه يتجوز عليها. لأن كل حاجة عندهم بحسابات ولها عمر افتراضي.. فهل ده صحيح؟!
فتحي محمد أبوبكر - الخطارة - قنا
** المحرر: ده كلام تهريج.. بس لو مطبق عندنا. كانت كل واحدة وصلت للأربعين جريت علي مكتب الأسرة وجابت قرار مد خدمة أو شهادة تجديد صلاحية.. أو حكم بتعيينها مستشارا للزوج للشئون المنزلية.
السبت سبتمبر 13, 2008 5:24 am
